Wann dir beim Bojenfeld vu Conleau ukommt, kritt dir vun engem Mataarbechter vun « Nautic-Sport » eng Bouée zougewisen ( VHF Kanal 8 ). Déi ass wahrscheinlech net direkt zu Conleau mee e bësse niewendrun, am Beräich vu Port Anna. De Semi-Rigide kënnt iech hëllefen, fir un d’Bouée ze goen, a bréngt iech dann u Land, wou nei Defien op iech waarden.
Preparéiert am viraus 2 Amarren riets a lénks um Virschëff, fir iech un der Bouée festzemaachen.
D’Melusina wëllt sécher sinn, dass déi Equipagen, déi säi Schatz an d’Gräpp kréien, mental a kierperlech op der Héicht sinn. Dofir invitéiert hat iech op der Hallefinsel vu Conleau op en « TRIATHLON BRETON » . 3 sportlech Defien, fir dem Melusina ze weisen dass dir toppfit sidd.
Notzt déi Zäit, déi dir elo nach ënnerwee sidd, fir iech ze preparéieren, an ze decidéieren, wien a wéi enger Disziplin untrëtt. Mir brauche vun ärem Equipage :
- 2 Leit déi paddelen
- 2 Leit déi schwammen
- 2 Leit déi balancéieren
All Crewmember muss dobäi op d’mannst bei enger vun den 3 Aktivitéite matmaachen. De Skipper an de Co-Skipper dierfen och matmaachen, mussen awer net.
Decidéiert elo, wien déi verschidden Aktivitéite mécht, fir dass déi Leit sech entspriechend preparéiere kënnen, an déi richteg Saache mat u Land huelen.
Déi 2 déi PADDELEN sollen eppes undinn, wat eventuell kann naass ginn (Schwammbox / Maillot oder Short + T-shirt). En Duch fir sech ofzedréchnen, ass och net dernierft.
Déi 2 déi SCHWAMMEN solle logescherweis Schwammbox oder Maillot undinn, en Duch mathuelen, an eventuell e Schwammbrëll oder Taucherbrëll, wann se een hunn.
Déi 2 déi BALANCÉIEREN solle bequeemt Gezei a stabil Schong undinn.
Déi Escale u Land dauert 1 ½ Stonn, halt also d’Auer am A a versicht no maximal 80 Minutten nees op där Plaz ze sinn, wou dir u Land kommt. Dir gitt dann nees zeréck op äert Boot bruecht.
All weider Informatiounen iwwer déi 3 Challengen, déi iech erwaarden, kritt dir, wann der do sidd.